Fisioterapia di mucha ta un spesialismo rekonosé denter di fisioterapia. Un fisioterapista di mucha ta spesialisá den tratamentu di mucha di 0 pa 18 aña ku un retraso den nan desaroyo di moveshon o ku problema di abilidatnan di moveshon. E kos spesífiko di mucha ta, ku konstantemente nan ta eksponé na kambio pa motibu di kresementu i desaroyo. Den e proseso akí kada fase di bida tin karakterístikanan spesífiko riba nivel motóriko, sensóriko, kognitivo, sosial i emoshonal. Esakinan hopi biaha ta konektá harmoniosamente.

 

Muchanan ku tin problema ku moveshon por desaroyá fásilmente problemanan sosial emoshonal komo konsekuensia di esaki, pa kual motibu nan ta isolá i tampoko no por partisipá bon na skol o ku deporte i wega. Asina fásilmente ta surgi un sírkulo visioso. Pa medio di integrashon den forma di wega i di ehersisio i wega na kas por bolbe kibra e sírkulo akí.

Nicole ta bini un biaha pa luna for di Kòrsou pa traha ku nos i ku e muchanan. Huntu ku un di nos terapistanan ta traha un plan di tratamentu. Hopi biaha e muchanan ta bini un biaha pa siman pa terapia. Sobrá di siman mayornan ta apliká konseho i ehersisio na kas.